Шатахуун импортлогчид Засгийн газар, иргэдийн “шүдний өвчин”болоод байна. Тэднийг шантааж хийлээ, төрийн дээр гараад суучихаж гэж үзэгсэд олон байна.
Үүнтэй зэрэгцээд шатахуун импортлогчид улстөрчидтэй, ялангуяа одоогийн УИХ-ын гишүүдтэй ямар холбоотой вэ гэдэг нь анхаарал татаж байгаа юм.
Ийм төрлийн бизнестэй шууд холбогддог хэд хэдэн гишүүн бий.
Харин 2016 оны УИХ-ын сонгуульд нэр дэвшихдээ шатахуун импортолдог компаниас хандив авсан нэр бүхий гурван гишүүн байдаг юм байна. Тэд Үндэсний аудитын газарт өгсөн сонгуулийн хандивын тайландаа энэ талаар бичжээ.
УИХ-ын гишүүн Н.Амарзаяа “Содмонгол групп”-ээс 10 сая төгрөг, УИХ-ын гишүүн Ш.Раднаасэд “Мон суль” ХХК-аас 15 сая төгрөг, УИХ-ын гишүүн О.Содбилэг “Петровис тос” ХХК-аас 15 сая төгрөг, “Петровис трейдинг” ХХК-аас 14 сая төгрөгийн хандивыг тус тус авсан байна.
