УЕПГ-ын Ял эдлүүлэх ажиллагаанд хяналт тавих хэлтсээс хорих ялаас хугацаанаас өмнө суллаж, хяналт тогтоосон хүмүүсийн оргон зайлсан шалтгаан, тэдэнд тавих хяналт хуульд заасны дагуу явагдаж байгаа эсэхийг 2018, 2019 оны нэгдүгээр улирлын байдлаар улсын хэмжээнд шалгажээ.
Дээрх хугацаанд шүүхийн шийдвэр гүйцэтгэх байгууллага болон цагдаагийн байгууллагаас хорих ялаас хугацаанаас өмнө суллагдаж, хяналт тогтоогдсон нийт 1994 хүнд хяналт тавьж ажилласан бол одоо 816 хүнд хяналт тавьж байна. Шүүхээс тогтоосон хяналтын хугацаанд дахин гэмт хэрэг үйлдэж ял шийтгүүлсэн хүн 2018 онд 16 байсан бол 2019 оны 1 дүгээр улирлын байдлаар 7 байна.
Шүүхийн шийдвэр гүйцэтгэх тухай хуульд зааснаар хорих ялаас хугацаанаас өмнө суллагдсан хүн хяналтанд байх хугацаандаа сар тутам бүртгүүлэх, байнга оршин суух газраасаа долоо хоногоос илүү хугацаагаар явах болшүүхийн шийдвэр гүйцэтгэх байгууллагад мэдэгдэх үүрэгтэй. Энэхүү үүргээ биелүүлээгүй хоёр хүний ялыг биечлэн эдлүүлэхээр прокуророос дүгнэлт бичиж, шүүхээр шийдвэрлүүлжээ.
Шалгалтаар хорих байгууллагаас хоригдлыг хугацаанаас өмнө суллаж, хяналт тогтоосон захирамж, зам явах хуудас, холбогдох баримт бичгийг тухайн хүний оршин суух газрын шийдвэр гүйцэтгэх байгууллагад хүргүүлдэггүй, хугацаа хэтрүүлж хүргүүлдэг, оргон зайлсан хүнийг эрэн сурвалжлах, олж тогтоох, ялыг биечлэн эдлүүлэх ажил хангалтгүй, мансууруулах эм, сэтгэцэд нөлөөт бодисыг хууль бусаар ашиглах гэмт хэрэгт ял шийтгүүлсэн болон халдварт өвчтэй хүнийг суллагдах үед нь эрүүл мэндийн байгууллагад мэдэгддэггүй зэрэг зөрчлүүд илэрчээ.
Эх сурвалж: news1.mn
