Заамар сумын нутаг дэвсгэрт алт олборлож байсан Эко Алтан Заамар компанийн уурхайн хана нурж жолооч нар амиа алдсан ноцтой осол гарсныг бид өмнө нь мэдээлсэн. Ослын талаар Заамар сумын ИТХ-ын дарга Ш.Галтбадрахаас тодрууллаа.
-Заамар суманд уурхайн ноцтой осол гарсан байна. Та бүхэнд ямар мэдээлэл байна?
-Тийм байна. “Эко Алтан Заамар” компанийн карьерын хана нурсан мэдээллийг бид дөнгөж сая авлаа.
-Осол гараад тодорхой хугацаа өнгөрсөн бололтой. Та бүхэн одоо л мэдэж байна уу?
-Сумынханд мэдэгдэхгүйгээр тас нуусан байна. Аймгийн онцгой байдал ч мэдээгүй байж. Гэтэл Улаанбаатараас Онцгой байдлын ерөнхий газраас аймгийн Онцгой байдал руу ярьж мэдээлсэн байна. Цагдаа ч мэдээгүй. Одоо л дөнгөж аймгийн цагдаа, мэргэжлийн хяналтынхан ослын газарт очиж байгаа юм байна.
-Карьерын хана нурсан гэдгийг тодруулахгүй юу?
-Уурхайн хана гэж 70, 80 метрийн гүнд машинаар тээвэр хийж байгаа. Тэр өндөр хана нурсан гэсэн үг. Гүнд тээвэр хийж байсан жолооч нар дарагдсан байна. Үүнийг бид дөнгөж сая мэдлээ.
-Хэчнээн хүн осолдсон бэ?
-Энэ тухай нарийн мэдээлэл алга. Ямартаа ч 2 хүн дарагдсан нь тодорхой байна. Албан бус мэдээллээр бол 10 орчим машин гэж байна. Компанийн зүгээс ослыг нууж ажилтнуудын утсыг хураасан байна.
-Сумын зүгээс ямар арга хэмжээ авч байна?
-Яг одоо манай байгаль орчны байцаагч хэсгийн төлөөлөгчийн хамт ослын газар руу гарч байна.
-Уурхайд хэчнээн хүн ажиллаж байсныг мэдэх үү?
-Эко Алтан Заамар компани Заамарт 3 лицензтэй. Нийт ажилчид гэвэл 800 орчим. Осол гарсан уурхайд 200 орчим ажилчин ажиллаж байсан болов уу.
-Энэ компанийн уурхайд өмнө нь бас ийм осол гарч байсан гэв үү?
-Тийм. Нэг жолооч хүнд даацын машинд дайруулж амиа алдсан харамсалтай хэрэг гарсан. Түүнээс гадна Туул эрэг дагуу алт олборлосон хэргээр Захиргааны хэргийн шүүх дээр маргаантай явж байгаа компани.
Эх сурвалж: news1.mn Б.ЗАЯА
