Төрийн мөнгийг гамна, төсвийн хөрөнгийг гамна гэж Ерөнхий сайдаасаа эхлээд шат шатандаа “үглэцгээж” байгаа.
Энэ үг төсөв барьдаг зарим хүний чихний хажуугаар өнгөрдөг бололтой юм.
Тэдний нэгээр НИТХ-ын дарга С.Амарсайханыг нэрлэе. Тэгэх шалтгаан байна.
Учир юу гэвэл НИТХ-ын төлөөлөгчид гэж байнга л гадаадад томилолтоор ажиллах нэргийдлээр ийш тийш ниссэн хүмүүс байдаг бололтой.
НИТХ-ын дарга С.Амарсайхан сар бүр хэд хэдэн Гадаад албан томилолтооор ажиллах тухай тушаал гаргаж суудаг юм байна.
Ганцхан төлөөлөгчийн зардлыг тооцоход л ядарсан манай эдийн засагт ямар дарамт болох нь тодорхой. Ирэх, очих онгоцны тийз, очоод буух зочид буудлын төлбөр, хоолны үнэ гээд л явж өгнө. Наад талын зайлшгүй зардал нь л энэ гээд бод.
НИТХ-ын дарга С.Амарсайхан 2017 оны аравдугаар сарын 19, 20-нд 67, 98, 69 дүгээр тушаалаараа тус бүр гадаадад томилолтоор ажиллуулах шийдвэр гаргаж, зардлыг зөвшөөрсөн байна.
Мөн 2017 оны арваннэгдүгээр сарын 15-нд НИТХ-ын Нарийн бичгийн даргын А/65, 27-ны өдөр НИТХ-ын дарга С.Амарсайханы 75 дугаар тушаалаар гадаад томилолтын зардал гаргажээ.
Түүнчлэн НИТХ-ын Нарийн бичгийн дарга 2017 оны арванхоёрдугаар сарын 8-нд А/67 тоот, НИТХ-ын дарга С.Амарсайхан 4-нд 80 дугаар, 20-ны өдөр 90, 91, 92, 94 гэсэн дөрвөн тушаал гаргаж НИТХ-ынхныгаа гадаад руу нисгэсэн байна.
2018 оноос хойш НИТХ-ын дарга болон төлөөлөгчид олон удаа гадаадын улсууд руу нисчээ.
Тухайлбал, нэгдүгээр сарын 12-нд гаргасан 2018 оны анхны буюу 01 тоот, 19-нд гаргасан 02 тоот тушаалуудаараа гадаад томилолтын зардал баталсан байгаа юм. Улмаар хоёрдугаар сарын 9-ний өдөр 05, 06, 07 дугаар бүхий тушаалуудыг бас л гадаадад томилолтооор ажиллуулах тухай, үүнд гарах зардлыг зөвшөөрч гаргасан байна.
Энэ мэтээр НИТХ-ынхан байнга гадаад руу нисч очиж ажилладаг гэж ойлгож болохоор байна. Онцгой тохиолдол биш л бол иймэрхүү зардлыг танах хэрэгтэй гэдгийг Засгийн газар ч, жирийн ард иргэд ч хэлээд зөвлөөд байгааг НИТХ-ын дарга, ноён С.Амарсайханд сануулъя.
Гадаад руу нисэхгүй л бол НИТХ ажиллаж чадахгүйд хүрчихнэ гэж ойлгохгүй байна. Гадаад руу төсвийн мөнгө үрээд нисч байхын оронд хороо, дүүрэг рүүгээ жирий гэж Төлөөлөгчиддөө тушаа гэдгийг хэлье.
Тэгээд ч ингэж ийш тийш нисээд байгаа мөнгө хэнийх вэ гэдгийг мартах хэрэггүй. Тэр хөрөнгө бол төсвийн буюу ард түмний өгсөн татварынх гэдгийг сана!
Эх сурвалж: www.news1.mn
