“Ариун цэврийн өрөө нь 00-н цаас тогтоогчгүй байсан. Ийм оромж хүлээж авсан” гэх Баянзүрх дүүргийн Засаг даргын орлогч Ц.Алтанзагасын бичлэг олон нийтийн сүлжээнд тарж иргэдийг бухимдуулж, УИХ-ын гишүүн М.Оюунчимэг Ерөнхий прокурор асан М.Энх-Амгаланд хэлж байсан шиг “орлогч нар том байна” хэмээн баалуулж сууна.
Уг нь орлогч гэх хариуцлагатай албан тушаалд очсон бол түүнийгээ дагаад биеэ авч явах байдал, үйлдэл бүрээ хянаж, амнаас унагас үг бүрээ цэгнэж байх учиртай.
Дүүргийн даргын орлогч эмэгтэйд тийм ёс суртахуун, ухамсар даанч дулимаг бололтой. Ямар сайндаа л хүн бүрийн аманд багтаж, олны тохуу болж суух вэ дээ. Албан газраа “оромж” гэж гутаагаад зогсож байж болох уу.
Ер нь тоо томшгүй, хэрэгцээгүй олон орлогч дарга нарын тоог цөөлж, төсвөө хэмнэвэл яасан юм. Нийслэлийн Засаг дарга зургаан орлогчтой. Дүүргүүдийнх нь Засаг дарга гурван орлогчтой. Тэдний унаа тэрэг, бусад зардал, цалин хөлс, урамшуулал гээд төсвөө хэмнэх боломж байна шүү дээ.
Эх сурвалж: 24tsag.mn
