Энэ УИХ ихээхэн барцадтай байна. Он гарахын өмнөхөн “бандааш”-ны хэрэг нь хоёр болж УИХ-ын гишүүн Д.Мурат нэмэгдсэн.
Тэгвэл өчигдөр /2018.1.6./ гурав дахь факт гарч ирлээ. Гэхдээ энэ удаагийнх нь эрхэм гишүүн өөрөө үйлдсэн “хэрэг” биш бололтой. Юу гэвэл эрхэм гишүүн эмэгтэйн нөхөр, хүргэн хоёртой холбоотой юм байна.
Энэ талаар хууль О.Алтангэрэл өчигдөр олон нийтийн сүлжээгээр мэдээлсэн юм. Тэрээ “… Өнгөрсөн онд нэгэн бүсгүй, өмгөөлөгчтэйгээ ирж уулзан, зөвлөгөө авсан юм.
Тэрээр нэг компанид ажиллаж байхад нь захирал нь байнга бэлгийн дарамт үзүүлсээр эцэст нь бэлгийн харьцаанд оржээ.
Захиралынх нь эхнэр нэгэн УИХ-ын эмэгтэй гишүүний (МАН-ын) дүү бөгөөд тэрхүү гишүүний нөхөр нь хүртэл бэлгийн дарамт үзүүлж байсан аж.
Эрхэм гишүүний дүү нөхөр болон бүсгүй хоёрын харьцааг мэдээд бүсгүйг компанид эд хөрөнгийн хохирол учруулсан гэж баримт бүрдүүлэн цагдаад өгч, эрүү үүсгүүлэн гишүүн эгч нь бас захиа даалгавар өгснөөр 20 гаруй сая төгрөгийн хохирол учруулсан гэж 8 жилийн ял авах гэж байгаа талаараа учирлаж ярьсан юм.
Тухайн үед асуудлаа хуулийн дагуу шийдвэрлэх боломжын талаар зөвлөөд явуулсан, шүүх хэргийг нь мөрдөн байцаалтад буцаасан юм билээ.
Гэтэл өчигдөр дахиад ирлээ, юу болов гэтэл өнөөх цагдаа, прокурор нь хэргийг яг хуучнаар нь боогоод яллах дүгнэлт үйлдсэн, эрхэм гишүүний захиас болохоор тэр муу “завхай” бүсгүйг заавал шийтгэнэ гэнэ!
Зоригтой бай, шаардлагатай бол хэвлэл мэдээллийн хэрэгсэлд ханд, өөрийн буруутай үйлдлээсээ давсан хариуцлага, ял шийтгэлийг хэрхэвч зөвшөөрч болохгүй, бүх талаар тусална гээд явууллаа…” гэж бичсэн байна.
Харин олон нийтийн дунд тэр эмэгтэй гишүүн бэ гэдэг таавар яваад эхэллээ.
