Афганистаны хөлбөмбөгийн үндэсний шигшээ багийн охид гэр бүлийн хамт Португаль улсад цагаачлаад байгаа юм.
Талибаны цэргүүдээс олон хоногийн турш нуугдаж байсан 14-16 насны охидыг гадаадад цагаачлуулахаар олон улсын хүний эрхийн байгууллагууд, хувь хүмүүс нэгдэж, Operation Soccer Balls нэртэй ажиллагааг хэрэгжүүлсэн юм.
Тэд хөлбөмбөгчин охидыг хүлээж авах улс орныг хайсны эцэст Португаль улсын засгийн газар улс төрийн орогнол олгохыг зөвшөөрснийг Associated Press мэдээлжээ.
“Бүх зүйл маш хурдан болж өнгөрлөө. Афганд байгаа манай хүн бидэнд ердөө гуравхан цагийн хугацаа байгааг хэлсэн. Хором бүр маш үнэтэй байлаа” гэж ажиллагааг зохион байгуулсан хүмүүсийн нэг, АНУ-ын Тагнуулын Төв Газар, Агаарын Зэвсэгт хүчинд алба хааж байсан Ник Маккинли ярьжээ.
Тэрбээр Даллас хотод DeliverFund нэртэй төрийн бус байгууллага байгуулсан нь 50 афган гэр бүлийг АНУ-д суурьшуулах ажлыг зохион байгуулсан юм байна.
Наймдугаар сарын дундуур нийслэл Кабул хотыг эзэлж авсан Талибанчууд олон улсын тавцанд шинэ дүр төрх бүрдүүлэхийг хичээж байгаа ч афганчуудын ихэнх нь тэдний 1996-2001 онд тогтоож байсан харанхуй бурангуй дэглэмийг мартаагүй байгаа.
Эмэгтэйчүүдийн ажил хөдөлмөр эрхлэх, сурч боловсрох эрх Талибаны шинэ дэглэмийн үед хангагдах эсэх нь одоо болтол эргэлзээтэй байна.
