Зэсийн үнэ гуравдугаар сараас хойш 60 орчим хувиар өсөж, пүрэв гаригийн арилжааны явцад Лондоны Металлын биржид тонн нь 7000 ам.доллар хүрсэн байна. Олон оронд “коронавирус”-ийн халдвар газар авч, агуулахын нөөцүүд нэмэгдэж, ирэх онд зэсийн илүүдэл үүсэх төлөвтэй байгаа. Жилд 24 сая тонн зэс хэрэглэдэг БНХАУ-ын эдийн засаг хурдацтай сэргэж байгаа нь үнэ өсөхөд нөлөөллөө. Нийлүүлэлт талаас харвал Перуд уурхайн ажиллах хүчний хомсдол үүссэнээр зэсийн гарц нь буурчээ. Харин зэсийн хамгийн том нийлүүлэгч Чили улсын гарц аажмаар нэмэгдсэн байна. Эрэлт талаас БНХАУ ирэх таван жилд цэвэр эрчим хүчний эх үүсвэрт анхаарах төлөвтэй байгаа нь үнэ өсөхөд нөлөөлж магадгүй байна. Баасан гарагийн байдлаар зэсийн үнэ тонн нь 6922.5 ам.доллар болж, өмнөх өдрийн хаалтын ханшнаас нэг орчим хувиар буурчээ.
