Нэр дэвшигчид нэгнийхээ аминд хүрсэн гэх мэдээлэл зарим хэвлэл мэдээллийн хэрэгслээр гараад буй. Энэ асуудлаар ЦЕГ-аас ташаа болохыг мэлэгдлээ. ЦЕГ-ын Хэвлэл мэдээллийн төвийн дарга Б.Баатархүү “Өмнөговь аймгийн Цогтцэций сумын ИТХ-д нэр дэвшигч согтууруулах ундааны зүйл хэрэглэсэн үедээ өрсөлдөгчийгөө автомашинаар дайрч амь насыг нь хохироосон гэх ташаа мэдээлэл гараад байна. Бодит байдал дээр аравдугаар сарын 14-ний өдрийн 15:10 цагт Өмнөговь аймгийн Цогтцэций сумын цагдаагийн хэлтэст хүн машинаар мөргөж амь насыг нь хохироосон гэх мэдээлэл бүртгэгдсэн.
Энэ дагуу сумын цагдаагийн хэлтэс хэргийн газарт шалгалт хийхэд 40 настай Б гэгч согтууруулах ундааны зүйл хэрэглэсэн үедээ автоамашин жолоодон ухрах үйлдэл хийж байхдаа М-ийн амь насыг хохироосон. Хэргийг шалгаж байна” гэв. Амь нас хохирсон М нь орон нутгийн сонгуульд бие даан нэр дэвшиж байсан бол жолоог барьж, осол гаргасан Б нь түүний найз бөгөөд сонгуулийн сурталчилгаанд ажиллаж байсан гэнэ. Өөрөөр хэлбэл өрсөлдөгч нар маргалдаж улмаар зөрчил үүсэн нэгнийхээ аминд хүрсэн бус согтуугаар тээврийн хэрэгсэл жолоодон ухарч байхдаа зам тээврийн осол гарсан гэв. Осол гаргасан жолооч Б ослын талаарх мэдээллийг цагдаагийн байгууллагад өгсөн бөгөөд гэм буруугийн асуудлыг шүүхээр эцэслэн шийдвэрлэх юм байна.
А.Наран
