ХУГАЦААНДАА ТАТВАРАА ТӨЛӨӨГҮЙ ТЭЭВРИЙН ХЭРЭГСЛИЙГ ЗАМЫН ХӨДӨЛГӨӨНД ОРОЛЦУУЛАХГҮЙ

Нийслэлийн Засаг дарга бөгөөд Улаанбаатар хотын захирагч “Авто тээврийн болон өөрөө явагч хэрэгслийн албан татвар, Авто зам ашигласны төлбөр, Агаарын бохирдлын төлбөр хураамж авах талаар зарим арга хэмжээний тухай” захирамж гаргаж, ажлын хэсэг байгуулсан. Улаанбаатар хотын ерөнхий менежер Т.Гантөмөрөөр ахлуулсан ажлын хэсгээс өнөөдөр мэдээлэл хийлээ. Хуульд зааснаар 1 болон 6-аар төгссөн улсын дугаартай тээврийн хэрэгсэл 1 дүгээр сард, 2 болон 7-оор төгссөн улсын дугаартай тээврийн хэрэгсэл 2 дугаар сард багтаан албан татвараа төлөх ёстой. 1, 2 дугаар сард татвараа төлвөл зохих нийт 170 мянга 260 тээврийн хэрэгсэл эзэмшигч байгаагаас 77 мянга 533 буюу 41,6 хувь нь татвараа төлжээ.

Нийслэлийн Татварын газрын Нийслэлийн төсвийн татварын орлогын тасгийн дарга Д.Очирсүрэн хэлэхдээ “Нэгдүгээр сард татвараа төлөх ёстой буюу 1, 6-аар төгссөн улсын дугаартай 80 мянга 382 тээврийн хэрэгсэл байгаагаас 36 мянга 636 тээврийн хэрэгсэл буюу 45 хувь нь хамрагдсан. Харин 2, 7-оор төгссөн улсын дугаартай 89 мянга 878 тээврийн хэрэгслээс 34 мянга 370 тээврийн хэрэгсэл эзэмшигч татвараа төлсөн. Өнөөдрийн байдлаар нийслэлийн төсөвт АТБӨЯХАТ-аас 5 тэрбум 250 сая төгрөг, Авто зам ашигласны төлбөрөөс 2 тэрбум 451 сая төгрөг төвлөрүүлээд байна. 2017 оны 1, 2 дугаар сард албан татвараа төлөх ёстой 80 мянга гаруй тээврийн хэрэгсэл одоогоор татвараа төлөлгүй замын хөдөлгөөнд оролцож байна.” гэлээ.

Замын цагдаагийн албанаас хуулийн хугацаандаа татвараа төлөөгүй тээврийн хэрэгслийг замын хөдөлгөөнд оролцуулахгүй талаар мэдээллээ. Замын цагдаагийн албаны Замын хөдөлгөөнийг зохицуулах хэлтсийн дарга, цагдаагийн хурандаа Б.Батболд хэлэхдээ “Гуравдугаар сараас татвараа төлөлгүй гудамж замын хөдөлгөөнд оролцож байгаа тээврийн хэрэгслүүдэд хяналт шалгалтыг хийж эхэллээ. Замын цагдаагийн алба хаагчид тээврийн хэрэгслийг зогсоож шалгаад татвараа төлсөн бол хөдөлгөөнд оролцуулна. Хэрэв хугацаандаа төлөөгүй бол тээврийн хэрэгсэл эзэмшигчид торгууль ноогдуулж, тээврийн хэрэгслийн гэрчилгээг хурааж авна. Гэрчилгээг харьяа дүүргийн татварын хэлтэст хүлээлгэн өгч, татвараа төлсөн тохиолдолд буцаан олгоно.” хэмээв.

Улаанбаатар хотын ерөнхий менежер Т.Гантөмөр хэлэхдээ “2016 онд автомашины татвар, төлбөр хураамжаас нийслэлийн төсөвт 25 тэрбум төгрөг төвлөрүүлэх байснаас 87 хувийн биелэлттэй байсан. Энэ онд нийслэлийн төсөвт 26,2 тэрбум төгрөг төвлөрүүлнэ.” гэлээ. Өнгөрсөн оны тухайд улсын хэмжээнд бүртгэлтэй 484 мянга 738 тээврийн хэрэгслээс татвар, төлбөр хураамжид хамрагдвал зохих 434 мянга 858 тээврийн хэрэгсэл байжээ. Үүний 338 мянга гаруй нь хамрагдсан байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

SHARE