Мэргэжлийн сумогийн Кюүшюү башё ирэх ням гаригт буюу арваннэгдүгээр сарын 11-нд эхэлнэ. Өвдөгний гэмтлийн улмаас хагалгаа хийлгэж, олон хоногийн турш бэлтгэл хийгээгүй, тойргийн барилдаанд оролцоогүй ёкозүна Хакухо М.Даваажаргал өчигдөр өглөөний бэлтгэлд гарчээ.
Хакухо хоёр цаг орчим бэлтгэлд оролцсон ч гэсэн барилдалгүй ихэвчлэн бие халаалт хийж, бөхчүүд зааж сургасан байна. Мөн хагалгаа хийлгэсэн баруун өвдөг нь боолттой байжээ
Тиймээс Кюүшюү башёд барилдахгүй байх магадлал өндөр байна. Ямартай ч өнөөдөр Хакухо шийдвэрээ зарлах юм.
Ёкозүна Какурюү М.Анандын хувьд шагайндаа зовиур мэдэрсэн хэвээр байгаа ч эмчийн зөвлөгөөгөөр эм ууж буй тул зовиур багасч байгаа гэнэ. Тэрбээр “Хэдийгээр бэлтгэл бүрэн ханаагүй ч гэсэн өмнөх сарын башёгоос илүү сайн барилдахыг хичээнэ” гэж мэдэгдсэн байна.
Харин ёкозүна Кисэносато “Би башёгийн өмнө хамгийн хүчтэй бөхчүүдтэй бэлтгэл хийхийг хичээдэг. Миний бэлтгэл сайн байгаа” хэмээн өгүүлжээ.
News1.mn