UFC-гийн хөнгөн жингийн дэлхийн аварга, 27 тулаанд 27 ялалт байгуулсан Оросын тамирчин Хабиб Нурмагомедов дахин тулаан хийвэл 50 сая ам.долларын урамшуулал хүртэх боломжтой гэнэ.
TMZ-д өгсөн ярилцлагадаа Хабиб Нурмагомедовын менежер Али Абдель-Азиз “Хэрвээ 50 сая ам.долларын урамшуулал олгоно гэвэл Хабиб дараагийн тулаанд гарч болно. Тэрнээс түүнийг хэт доогуур үнэлж, Конороос хавьгүй бага мөнгө өгч байна” гэж мэдэгдсэн юм.
UFC-гийн ерөнхийлөгч Дэн Уайтаас 50 сая ам.доллар Хабиб Нурмагомедовт амлаж тулаан зохиох боломж байгаа эсэхийг нэгэн сэтгүүлч асуухад “Боломж байлгүй яахав. Тэд ч гэсэн ийм боломж бий гэдгийг мэднэ. Тэгэхээр асуултынхаа хариултыг тэд мэдэж байгаа гэсэн үг” хэмээн өчжээ.
Хабиб Нурмагомедов аравдугаар сарын 6-нд Конор Макгрегорыг боох мэхээр ялсан ч тулааны дараагаар октагон даван харайж ирланд тулаанчийн бэлтгэл хангагчтай нударга зөрүүлсэн хэргийн улмаас 2 сая ам.долларын урамшууллаа хүртээгүй байгаа юм.
Одоогоор Хабиб Нурмагомедовын дараагийн өрсөлдөгч хэн байхыг товлоогүй байна.
news1.mn